عمرو أديب: الشوربجي معملش حاجة غلط أنتوا قدمتوا ليه إيه «فيديو»

تضامن الإعلامي عمرو أديب، مع لاعب الإسكواش المصري محمد الشوربجي، بعد قرار تجنيسه واختياره اللعب باسم إنجلترا بدلا من مصر في المسابقات الدولية، قائلا: "الراجل معملش حاجة غلط، نص حياته مقضيها في إنجلترا تربيته وأكله وشربه كلها كانت في إنجلترا".

وأضاف أديب، خلال حلقة اليوم من برنامجه "الحكاية" المذاع عبر فضائية "إم بي سي مصر"، مساء الإثنين: "قالبين الدنيا ليه، الحق إنت مقدمتش للشوربجي حاجة، هو اللي قدم لمصر بطولات كثيرة لما كنت بتستدعيه يلعب باسم مصر".

وتابع: "خلاص هيلعب اسكواش مع بريطانيا ربنا معاه، إيه اللي أنت عملتهوله، عشان يكمل معاك أو يلعب باسم مصر، هو حر، مش هتخلي حد يلعب غصب عنه".

وأكمل: "يوجد محاولة من قبل البعض إلصاق تهمة الخيانة العظمى بالشوربجي، معقبا:"إحنا نقوله متشكرين و مصر ولادة، وربنا معاك، وأنا شايف إن الشوربجي دفع الدين اللي في رقبته لمصر بطولات قارية وعالمية".

وأردف: "بلاش الحالة التشنجية دي، الشوربجي تحت إغراء غير طبيعي والموضوع مش سهل، تمنوا له حظا سعيدا، معقبا: "عندك جوهرة حافظ عليها، واتعاملوا بشويش على الناس، إحنا عندنا آلاف الأطباء والمهندسين اللي بيسافروا برة وياخدوا الجنسية الأجنبية ومحدش بيتكلم عنهم ولا يهاجمهم".

وفي السياق عينه، أكد عمرو السنباطي، عضو مجلس النواب ورئيس مجلس إدارة نادي هليوبوليس، أنه فور قرار محمد الشوربجي نجم الإسكواش بتمثيل إنجلترا بدلا من مصر، تم فسخ التعاقد بعد الإخلال بالعقد بتمثيل إنجلترا وعدم الالتزام بما نص عليه العقد بين النادي والشوربجي.

وأضاف "السنباطي" خلال تصريحات تليفزيونية له الليلة:"النادي من حقه إنهاء التعاقد مع اللاعب بعد قرار التجنيس لصالح المملكة المتحدة، معقبا: "أوقفنا التعاقد مع الشوربجي والعقد أساسه التراضي بين الطرفين ولدينا أبطال عالميين في لعبة الإسكواش".