نيللي كريم: كندة علوش إنسانة بتشع حب وطاقة.. ومفيش تصوير من غيرها

ظهرت النجمتان نيللي كريم وكندة علوش ضيفتين في برنامج "معكم منى الشاذلي"، وتحدثتا عن علاقتهما التي تعود لأكثر من 15 سنة، وتحديدًا منذ لقائهما الأول في سوريا أثناء تصوير مسلسل "هدوء نسبي"، رغم إنهما ما اشتغلوش سوا في مشاهد مباشرة.

نيللي حكت عن بداية معرفتها بكندة، وقالت: "كنت بصور في سوريا من 15 سنة، وقعدت هناك شهرين وكنت مش عارفة حد، واتعرفت على كندة وانبسطت جدًا، وقتها ما كنتش عارفة إنها مهتمة بالتمثيل بالشكل ده، كانت لسه بتجرب حاجات تانية".

كندة بدورها أكدت إن علاقتهم بدأت بسبب السفر والتصوير، وقالت: "ما اشتغلناش مع بعض في مشاهد، بس كنا بنسافر ونقعد في نفس اللوكيشن، ومن أول مرة شفتها حبيتها".

أما عن شخصية كندة، وصفتها نيللي بأنها إنسانة دايمًا مليانة طاقة حب وكرم، وقالت: "في تصوير مسلسل إخواتي كانت شنطتها مليانة أكل للجميع، من بومبوني لمكسرات، وتسأل كل الناس تحبوا تاكلوا إيه؟، طاقتها إيجابية وبتحب تساعد الكل وتحل مشاكلهم"، وأضافت ضاحكة: "أول ما أوصل اللوكيشن بسأل: كندة جت؟".

وبالنسبة لدورها في مسلسل "إخواتي"، قالت نيللي إن شخصية "سُهى" اللي بتقدمها قوية وما بتستسلمش بسهولة، ووصفتها بأنها "شخصية فيها شراسة لما الموقف يستدعي"، خصوصًا إنها خيّاطة ضربت واحد بأيد واحدة في أول حلقة، فكان لازم تبان الشخصية بالشكل ده.

وأشارت إنها بتدخل في تفاصيل الشخصية لدرجة إنها بتعيشها بالكامل، من لبسها لطريقة مشيها، وأضافت: "أنا لما بدخل في الدور، ببقى هي تمامًا.. اللبس، الماكياج، الشعر، حتى المشي.. كله بيكوّن الكومبو اللي الناس بتشوفه على الشاشة".