عاجل | حمزة علاء يوضح حقيقة رفضه التفاوض مع إدارة الأهلي
أصدر حمزة علاء، حارس مرمى الفريق الكروي الأول بالنادي الأهلي، بيانًا رسميًا، للكشف عن حقيقة رفضه الجلوس مع إدارة النادي لتمديد عقده.
ونشر حمزة علاء، عبر حسابه الرسمي على موقع التواصل الاجتماعي "إنستجرام"، بيان قال: "رسالة لجماهير النادي الأهلي الغالية .. حابب أوضح حاجة مهمة بخصوص الكلام اللي اتقال عني في الإعلام مؤخراً، واللي بيقول إني رفضت أقعد مع إدارة النادي أو الناس المسؤولة في النادي اللي اتشرف بالانتماء ليه منذ طفولتي وحتي الان".
وأكمل: "الكلام ده كله مش حقيقي ومفيش منه أي حاجة صح، أنا عمري ما أتأخرت عن أي اجتماع يخص مصلحة النادي، وبحترم كل شخص مسؤول في الكيان ده، وموجود دايمًا علشان أسمع وأتكلم في أي وقت يتطلب كده".
وأردف: "النادي ده ليه مكانة كبيرة عندي، وكل يوم بفتخر إني بلبس التيشيرت بتاعه، وبحس دايما بدعمكم اللي لا يقدر بثمن واللي هو الدافع الحقيقي في كل يوم ليا في نادينا العظيم".
وتابع: "جمهور النادي الأهلي، أنتم ليكم فضل كبير جداً جداً عليا، وأنتوا سبب كبير جداً ورئيسي في اللي وصلت له، محبتكم وسندكم عمرهم ما كانوا عاديين، وأنا شايل ليكم تقدير وحب كبير أوي جوه قلبي، وأعتقد كلكم عارفين أن أنا حبي للنادي وللكيان ملوش حدود".
وأتم: "عمري ما أقدر أغلط ولا في النادي ولا في جمهوره ولا في أي مسؤول داخل النادي، وأنا مش الشخص اللي يكون ده موقفه مع النادي، فأنا أتشرف بالانتماء إليه والي جماهيره، كل الحب والاحترام للنادي الأهلي وجمهوره العظيم".
