فريدة سيف النصر: مش بهتم أحضر المهرجانات.. والتكريمات حطاها في المطبخ

أعلنت الفنانة فريدة سيف النصر سبب عدم حضورها المهرجانات الفنية أو حتى استلام تكريماتها.

وكشفت فريدة سيف النصر خلال لقائها في برنامج "أسرار النجوم" من تقديم الإعلامية إنجي علي عبر قناة وإذاعة "نجوم FM"، قائلة: "بتجيلي تكريمات ومهرجانات كتير لكن أنا مش بهتم، آخرها كان مهرجان الدراما للدكتور يحيى الفخراني، لكن أنا ما شفتش حتى الرسالة".

وأضافت فريدة سيف النصر: "حياتنا فيك جوا الشاشة بنلبس لبس كتير ونحط مكياج كتير، أنا برا بقى مش عايزة غير أبقى فريدة ومن حقي أبقى فريدة شوية واتخلع من الجو اللي حواليا اللي مش بيخليني فريدة".

وتابعت فريدة سيف النصر: "عندي تكريمات بتاع 20 واحدة حطاهم في المطبخ وكان لسه عندي تكريم في إسكندرية والجامعة الكندية ومروحتش، ودا بيحصل على مدار السنين لأن أنا شفت ومش هذكر أسماء نجوم كبيرة جدا الجوائز بتاعتهم بتتباع في سور الأزبكية أول ما الورثة بتاخد الحاجة بتترمي وتتباع".

واستعادت فريدة سيف النصر ذكرياتها خلال اللقاء مع الفنان سمير غانم وحكت:"اشتغلت مع سمير غانم مسرح وسينما، أنا كنت بحب الرقص والغنا جدا كان في مسرحية اسمها "الخوافين" قدمت فيها كل أنواع الرقص هندي، روسي، إفريقي، وسمير غانم كان مسميني "فريدة سيف الرقص" كنت أي رقصة اتدرب عليها أقدر أعملها".

وتابعت فريدة سيف النصر: "سمير غانم ودلال عبد العزيز مرحلة من حياتي مهمة، كانت دنيا سمير غانم تخرج معايا وهي صغيرة مع ابني، كنا عائلات مع بعض وحب كبير بينا".

يذكر أن فريدة سيف النصر شاركت في رمضان 2024 بمسلسل "العتاولة".