«تصريحات حاسمة».. أبرز رسائل «السيسي» من قلب السويس

يشهد الرئيس عبدالفتاح السيسي، اليوم الأربعاء، إجراءات تفتيش حرب الفرقة الرابعة المدرعة بالجيش الثالث الميداني بالسويس.

وقال السيسي، إن مصر تقوم بدور فعال وإيجابي لحلحلة الوضع في قطاع غزة.

وأضاف الرئيس: "هوضح أكثر، اوعى أوهام القوة تدفعك تاخد قرار وتعمل إجراء تقول بعد كده مكنتش دارس كويس، كنت مدفوع بغضبي وحماسي".

وأوضح الرئيس: "كان مهم أوي أقولكم الكلمتين دول في المناسبة دي، وبمناسبة تطورات وضع غزة، بنقوم بدور إيجابي جدا جدا في تهدئة الأمور ولوقف إطلاق النار بشكل أو آخر، وإيقاف نزيف الدم، وفي نفس الوقت نسعى جاهدين للتعاون مع الأشقاء لاحتواء التصعيد ومساندة المدنيين في قطاع غزة بالمساعدات اللي هم في أحوج الحاجة إليها".

وتابع: "من يوم 7 أكتوبر لغاية دلوقتي 17 يوم وأكتر مفيش مية ولا كهرباء، وحتى المواد الطبية، بنبذل جهد عشان نخفف عن أهلنا في القطاع".

وتابع الرئيس: "مهم أوي إننا نبذل كل الجهد لتقليل المعاناة، ودايما في كل مناسبة، حصل في العشرين سنة اللي فاتت، 5 صراعات مع القطاع أو حماس أو الجماعات الموجودة، وكان دايما دور مصر إيجابي، وبنقول دايما إن حل القضية الفلسطينية من خلال الحل الدبلوماسي وإعطاء أمل للفلسطينيين وعودة الأراضي التي احتلت بعد 67".

وأكمل: "مرة تانية سعيد بوجودكم، وعايز أقول إن اللي شايفه هنا أمر يدعو للفخر، بنتكلم على تشكيل من عدة تشكيلات، كل التشكيلات بالمستوى اللي احنا شايفينه ده، مهما كانت قوتك، هي قوة رشيدة، تبني وتصون وتحمي ولا تعتدي".

وواصل الرئيس: "بقول في اليوم ده، محتاجين نتسلح دايما بالعلم والمعرفة حتى نكون قادرين على استيعاب التقدم في مجالات التفوق والتطور اللي بتشهدها المعدات والأسلحة الحديثة، وأيضا النظريات المختلفة، ثم حاجة مهمة أوي أخرى، وهي الإيمان، معناه الخلق والنزاهة والشرف وعدم الخيانة والتآمر، انتبهوا للمحورين ده، العلم والمعرفة والإيمان، هو ده سبيل امتلاك قوة لا تقهر، لأنها هتبقى مدعومة بأسباب الدنيا وأسباب السماء، لأنك بتتعامل بشرف من غير خيانة أو خسة".

واختتم بالقول: "آخر حاجة دايما حافظوا على جاهزيتكم، ربنا يحفظكم، ودايما مصر بجيشها في أمن وسلام وأمان".