«قلة أدب».. شوبير يفتح النار على الشامتين في إصابة إمام عاشور
فتح الإعلامي أحمد شوبير، النار على الشامتين في إصابة إمام عاشور لاعب الفريق الأول لكرة القدم بالنادي الأهلي، والتي تعرض لها أمس الأحد، خلال مباراة الإسماعيلي ضمن منافسات الدوري.
وتعرض إمام عاشور لإصابة قوية خلال أحداث المباراة، تسببت في خروجه باكيًا من أرض الملعب، حيث توجه إلى المستشفى مباشرة لإطمئنان على حالته وقوة الإصابة.
وقال شوبير في تصريحات إذاعية: "لما يتعب حد عندك في بيتك أو حد صاحبك أول حاجة بتقولها إيه، ألف سلامة أو لو حد حتى متحبوش هتقول يا سيدي الله يسهله".
وتابع: "دلوقتي لما يحصل عندنا إن حد يتصاب، وأقصد إمام عاشور لما اتصاب إمبارح الولد فضل يعيط عشان خاف، ولقيت حاجتين ضايقوني جدا الحقيقة، الأولى البعض قال إمام عاشور جاله رباط صليبي، إمام جاله كسر في رجله، وهنفوت دي ونقول ماشي كانت اجتهادات".
واختتم: "الحاجة التانية الصعبة جدا هي شوية الدعوات زي اللهي تنام ما تقوم، اللهي مش عارف إيه، إيه ده يا جماعة إيه اللي حصل لنا أنا مستغرب جدا، إمام راح الأهلي راح الزمالك مش قصة، إيه كم الغل اللي موجود عند البعض ده، ويردوا عليك يقولولك أصل ده تحفيل ده مش تحفيل ده قلة أدب إن حد يدعي عليك".
