«عايز أشيل عن أبويا».. سيف شكري يكشف أسباب هروبه من معسكر منتخب المصارعة

كشف سيف شكري لاعب منتخب مصر للمصارعة، أسباب هروبه خلال سفر الفراعنة إلى قيرغيزستان، استعدادًا لبطولة العالم.

وتفاجأ مسؤولو منتخب مصر للمصارعة تحت 23 سنة، هروب سيف شكري خلال الترانزيت في دبي، قبل أن يظهر ببولندا الأيام الماضية.

وظهر سيف شكري في فيديو عبر موقع "فيسبوك" قال فيه: "أنا سيف الدين شكري لاعب منتخب مصر للمصارعة الحرة، 22 سنة، أنا بطل إفريقيا 5 مرات، بواقع ذهبيتين وفضيتين وبرونزية، بالإضافة إلى بطولة إبراهيم مصطفي الدولية ومصنف عالميًا أكتر من مرة وبطل العرب".

وتابع: "أول مشاركة دولية ليا كانت في بطولة إفريقيا 2019 بتونس، كان عندي 18 سنة، أحرزت الميدالية الذهبية في بطولة الشباب والبرونزية في بطولة الكبار".

وشدد: "أبويا صرف عليا كتير علشان أوصل للإنجاز دا، وأنا بلعب مصارعة من وأنا عندي 5 سنين، بعد بطولة إفريقيا رجعت مصر وأنا فاكر الدنيا هتبقى أحلي وهيكون معايا فلوس وعندي عربية".

وواصل: "وقتها اتحاد المصارعة قالي هيكون ليا مرتب شهري ومكافأة، والخير جاي، بعدها قالولي المرتب هيكون 850 جنيه وبعد الضرائب هيكون 745 جنيه، ولما سألت على مكافأة الميداليتين، أخدت واحدة بس عن الميدالية الذهبية، وطلعت 5 آلاف جنيه، وأخدتها بعدها بسنة".

وأكمل: "بعدها تعرضت للإصابة ووالدي صرف عليا كتير جدًا، ولعب المصارعة مكلف من تغذية ومعدات وملابس وعلاج وبروتينات، وحذاء المصارعة فقط بحتاج واحد كل 3 شهور، وسعره لا يقل عن 2000 جنيه، وكل ده كان على نفقة والدي، وأنا عايز أساعده بس مش عارف".

وتابع: "نفسي أحقق ميدالية أولمبية ومش عارف بسبب الصعوبات، وكل ما كنت بحقق ميدالية مفيش أي وسيلة إعلامية حتى تسجل معايا ولا خبر عني، وحتى معنديش عجلة أروح وأرجع بيها من التمرين".

ووجه سيف رسالة إلى زملائه بالمنتخب، سواء الحرة أو الرومانية، حيث قال: "بحبكم جدًا وقضيت معاكم أحلى أيام حياتي، على البساط وفي التمرين، وأتمنى كل مطالبكم تتوفر ويكون فيه دعم ليكم، علشان تقدروا تكملوا وتحققوا ميداليات أكتر".

واختتم سيف شكري الفيديو برسالة لوالده ووالدته، قائلَا: "أنا آسف إني أخدت الخطوة دي من غير ما أقولكم، بس كان لازم أعمال كدة علشان أشيل عنك يا أبويا".