«مش هندخل المزاد».. ميدو يكشف كواليس مفاجئة في مستقبل إمام عاشور

كشف أحمد حسام ميدو نجم الزمالك السابق، كواليس مفاجئة في مفاوضات القلعة البيضاء لضم إمام عاشور لاعب ميتلاند الدنماركي، خلال الفترة الماضية.

وقال ميدو في فيديو عبر حسابه الرسمي على موقع تبادل الصور والفيديوهات "إنستجرام": "إمام عاشور لاعب كويس ومن أحسن اللاعبين في مصر، وهيكون إضافة فنية كبيرة لأي فريق هينضم ليه".

وتابع: "في أخر 24 ساعة طلع كلام كتير عن إني دخلت في مفاوضات مع إمام عاشور لعودته إلى نادي الزمالك، وتفاصيل كتير ملهاش أي أساس من الصحة".

وشدد: "أنا ماليش منصب داخل نادي الزمالك، أنا راجل محب للنادي وبحاول أعمل اللي هقدر عليه".

وواصل: "إمام كلم ناس في الزمالك وقالهم أنا مستعد أجي بأي رقم بس خلصوا مع النادي، أنا بنفسي اتحركت واكتشفت إنه مخلص مع الأهلي وموقع من 4 أيام، فإحنا مش صغيرين واللي بيعمله إمام ده عشان يبين إنه مرغوب فيه".

وأضاف: "الأهلي أنهى كل شئ في صفقة إمام عاشور منذ 4 أيام، وبقول للناس أوعوا ترددوا نغمة إن الأهلي خطف إمام من الزمالك، إمام عاشور مش رضا عبدالعال".

واختتم ميدو تصريحاته: "والد زوجة إمام كلمني الخميس اللي فات وقالي إحنا زملكاوية، كلمت إمام الجمعة الصبح قولتله يا ابني عايز تعمل إيه؟ قالي عندي عروض كتير من جوه وبره مصر، وقالي أحسن عرض ليا هاخده، وقولتله مش هندخل المزاد عليك".