«شكرًا للرئيس السيسي وآسف يا بابا».. ماذا قال بغدودة في أول ظهور له بعد هروبه؟
رد أحمد فؤاد بغدودة لاعب منتخب المصارعة، على اتهامه بالهروب من معسكر المنتخب في تونس، عقب التتويج بالميدالية الفضية لبطولة إفريقيا.
وقال بغدودة في فيديو نشره على حسابه الرسمي على موقع التواصل الاجتماعي "فيسبوك"، في أول ظهور عقب واقعة اختفاءه: "السلام عليكم أنا اسمي أحمد فؤاد بغدودة، لاعب منتخب مصر للمصارعة، أتوجه بالشكر والتقدير والاحترام للرئيس عبد الفتاح السيسي، وشعب مصر العظيم".
وتابع: "أحب أشكر حضرتك يا ريس على دعوة الأكاديمية، بجد أنا أول ما عرفت إنك بعتلي الدعوة دي كنت مبسوط جدًا والله وبحب أشكر حضرتك، وأنا مش هارب والله ولا حاجة، أنا بحب مصر، وأنا اتولدت فيها، وهموت فيها، ومصر مليانة مواهب كتيرة زي أحمد بغدودة بس عايزين الدعم وحسن التعامل مع اللاعيبه".
وشدد: "أحب أشكر الشعب المصري العظيم على دعمه، وبجد إنتو أجمل حاجة في حياتي، وادعولي الفترة دي، وبجد يا سيادة الرئيس أنا بشكر حضرتك على الاهتمام وشكرًا يا فندم".
وواصل: "أبويا الحاج فؤاد عامل إيه واحشنى والله، أنا آسف إنى أخدت القرار ده من غير ما أعرفك لأني مش بخبي عليك حاجة، بس والله لو أنا قولتلك مكنتش هتوافق وكنت هتقولي عايزك تحقق حلمك".
وأضاف لاعب منتخب المصارعة: "أنا آسف يا بابا بس أنا بقيت راجل، وعندي إحساس أنت تعبت معايا كتير أوي وكنت بتبخل على نفسك وعلى إخواتي عشان أعرف أصرف على نفسي وعلى كليتي وعلى سفري وعلى ڤيتاميناتي".
وأكمل: "وأمي حبيبتي وحشتيني، والله أنا مش عارف أقولك إيه غير سامحيني، إني قلقتك عليا كتير، بس والله يا أمي مش بايدي انتي عارفة لو بايدي كنت عشت تحت رجلك انتي وأبويا وإخواتي، وإخواتي حبايبى ربنا يخليكم ليا يا رب وأشوفكم أحسن الناس".
واختتم بغدودة تصريحاته: "أهلي حبايبي هتوحشوني كتير وبشكر أهل مدينتي بيلا، على الدعم ودعواتكم ليا، وبشكر أصحابي واخواتي إللى واقفين في ضهري بجد انتوا أحسن حاجة في حياتي وربنا يخليكم ليا يا رب، وبشكر الشعب المصري، السلام عليكم".
