«عايشين في دولة الخطيب».. مرتضى منصور يعلن التصعيد بأزمة سب شيكابالا
علق مرتضى منصور رئيس نادي الزمالك، على أزمة محمود عبد الرازق شيكابالا قائد الأبيض، بعد تعرضه للسباب من قبل جماهير الأهلي، في مباراة فاركو الأخيرة بالدوري.
وقال مرتضى منصور في فيديو مصور عبر "يوتيوب": "سؤال لوزير الرياضة، أنا اتحبست شهر بسبب سب أخت محمود الخطيب اللي محدش جه ناحيتها، لكن احترمت القانون والدولة والقضاء، أنا دايما مش بحب اشتكي حد من بلدي خارج بلدي".
وتابع: "لكن بعض الجماهير المفروض منتمية للنادي سبت شيكابالا، ومفيش بيان من مجلس إدارة الأهلي يعتذر، وعدم الاعتذار معناه إنكم موافقين على التصرف".
وشدد: "الوزير قال أي حد هيغلط في الوسط الرياضي، هيتم معاقبته، الناس افتكرت إن البيان لأي حد، لكن دا كان معمولي أنا، لأننا في دولة محمود الخطيب اللي فوق القانون".
وواصل: "شيكابالا مكنش بيلعب ولا الزمالك مكنش طرف، طيب بتشتموه ليه؟، علشان هما في دولة محمود الخطيب، هى دولة الخطيب بقت أقوى من أي حد؟".
وأعلن: "بكرة المحامي هيبعت شكوى رسمية للاتحاد الدولي، ضد الجماهير إللي اساءت لجماهير الأهلي، قبل ما تسيئ لينا في الزمالك".
وأكمل: "اللي بيحصل عدى كل الحدود، والخطيب قاصد يستفزنا، والناس خايفة تقربله، الموضوع زاد عن حده، وجمهور الزمالك جاب أخره".
واختتم مرتضى منصور تصريحاته: "أنا جمعت كل الإساءات اللي حصلت ضد شيكابالا ونادي الزمالك، في كل المباريات وعلى السوشيال ميديا، والمحامي الإيطالي هيقدم شكوى للاتحاد الدولي، وهنجيب حقك يا شيكابالا".
