بالفيديو.. محمود بدر لوزير التموين: «أوعى تتأنعر على الشعب والحكومة تضبط كلامها»
انتقد النائب محمود بدر عضو مجلس النواب عن تنسيقية شباب الأحزاب والسياسيين، وزير التموين علي المصيلحي.
ووجه له حديثه قائلًا: "ما ينفعش تتأنعر على الناس".
وأضاف بدر خلال كلمته في الجلسة العامة اليوم: "لما نحب نختصر رؤية وزارة التموين بخصوص الدعم نرجع لتصريح سيادة الوزير لما قال (الناس عايزة زيت بيور، أنت جاي تاخد دعم وتتأنعر)".
وواصل: "علشان المواطن بيطلب حقه في سلعة نضيفة".
ومن جانبه، دعا المستشار الدكتور حنفي جبالي، رئيس مجلس النواب، أعضاء المجلس بالهدوء، أثناء مواجهة وزير التموين والتجارة الداخلية علي المصيلحي.
ووجه رئيس المجلس حديثه للنواب: "ما لكم النهاردة فيه فرط حركة.. هو فيه حاجة بعد الجلسة ولا إيه؟".
ليرد بدر قائلًا: "زي ما تطلب مننا ضبط انفعالاتنا نرجو أن الحكومة تضبط تصريحاتها، كل وزير ما ينفعش يتأنعر على الشعب المصري، كل وزير بياخد مرتبه من ضرائب الشعب المصري ما ينفعش يتأنعر على الشعب".
فيرد وزير التموين على تلك الانتقادات اللاذعة بابتسامة خفيفة، ليرد بدر: "بجملة الضحك اللي بيضحكه، نكتة لمواطن شالوا مراته من بطاقة التموين من سنة 2018، بحجة إنها ميتة، لحد النهارده 2023 بيحاول يثبت إن مراته لسه عايشة".
واختتم بدر "عايزين موظفين يشتغلوا بجد يشوفوا الأسعار بجد ما يقعدوش يتأنعروا على المواطن المصري، كفاية أنعرة لحد كده".
