ياسمين عز: مفيش راجل بيهاجمني..وهجومي على أحمد موسى شائعة
نفت الإعلامية ياسمين عز، شائعة هجومها على الإعلامي أحمد موسى، قائلة: إن الأزمة مفبركة وأنها تكن له الاحترام والتقدير.
وقالت ياسمين عز، في تصريحات لها، خلال برنامجها "كلام الناس": لم أتطاول على الإعلامي أحمد موسى والكلام والتصريحات المنتشرة مفبركة مقولتهاش أساسا، وأنا بكنّ له كل الاحترام والتقدير، ولكن مين ورا الحكاية دي؟ ومين له مصلحة يكتب على لساني كلام متقالش؟ والناس اللي بتعمل شير للتصريح المفبرك دا مش بيتأكدوا من المعلومة؟ مش بتكلف نفسك تشوف لي فيديو قولت دا إمتى؟
وواصلت ياسمين عز: كان المفروض تعرفوا بسهولة إنه كدب ومتفبرك ودا لا أسلوبي وطريقتي؛ لأن الملاك الأبيض دا ميقولش الكلام دا أبدًا، واللي كاتب التصريح دا ساقط في فنون الرد وبقول له لو عايز تتعلم تعالى نتسلى مع بعض ولكن مش على بعض، الكل عارف إني بحترم كل الزملاء ومش بقول الألفاظ دي وبتمنى التوفيق للجميع.
وأضافت ياسمين عز: أنا عمري ما هتطاول على راجل وآجي عليه؛ لأنه أحلى شيء في الحياة وكائن بريء وجميل زي ما ربنا خلقه، وأحلى حاجة في الحياة أنك تكون مشغول بنفسك ومعندكش وقت تتكلم على حد غيرك، وعلشان تكون مبسوط لازم تركز على نفسك والحمد لله أن ربنا شغلني بنفسي مش بـ غيري.
