حسن الرداد: ”سمير غانم توفي بنفس الغرفة التى توفيت فيها والدتي”
تحدث الفنان حسن الرداد عن تفاصيل علاقته بالفنان الراحل سمير غانم والفنانة دلال عبد العزيز، مشيرًا إلى أنهما كانا من أجمل الشخصيات التى عرفها في حياته.
وتابع حسن الرداد خلال تواجده في برنامج "صاحبة السعادة" قائلًا: "لما تعب سمير غانم ودخل المستشفى، كنت مش عارف أبص على الدور اللى مات فيه لأنه نفس الدور اللى شهد وفاة أمى، ولكن القدر كان غريب لما توفى في نفس غرفتها اللى ماتت فيها".
وكشف حسن الرداد عن موقف كوميدي حدث مع زوجته الفنانة إيمي سمير غانم، حيث قال: "أنا طول عمرى ما بحبش الحيوان اللى حركته سريعة، وتاريخي مع القطط والكلاب زي الزفت، يعني كنت أنزل أجيب حاجة من الشارع ألاقى كلاب بتجري ورايا، فطلعت بخاف من الكلاب وبعتبرها عدو للإنسان، أما القطط أبقى في مكان ألاقى قطة ترعبنى فجأة، وأروح أي مكان ألاقى القطة تسيب الناس وتقعد جنبي، ولكن لما اتجوزت إيمي شفت الكلاب قد إيه بيعتبرها اللى بيربيها واحد من عياله".
وأضاف: "وشفت إيمي عاملة مع الكلاب والقطط إزاي وبتأكلهم طول الوقت، وبعدها في مرة إيمي قالت لى واحنا قاعدين عارف يا حسن أنا بقيت بحبك قد الكلاب، فقلت لها ده مدح ولا ذم، قالتلى مدح طبعا، ده أنا كنت بقول لبابا كده إن هو والكلاب أكتر حاجة بحبها في حياتى".
