ميار الببلاوي ترد على منتقديها: «لولا إن الانتحار حرام كنت قتلت نفسي»

وجهت الفنانة ميار الببلاوي رسالة لمنتقديها، بعد تصريحاتها الأخيرة مع الإعلامية مروة صبري.

ميار الببلاوي ترد على منتقديها برسالة قاسية

ونشرت الببلاوي منشورًا، عبر حسابها الرسمي بموقع "إنستجرام"، مكتوب فيه :" أنا مش هدافع عن نفسي ومش هقول إني صح بس ربنا شاهد إني بتكلم بعفوية ومبعرفش اتخابث ولا قصدي إي اساءة لأي حد من زملائي اللي بحبهم وبقدرهم، وبعتز بأي عمل شاركتهم فيه طوال السنين اللي فاتت وأنا لا عاوزه أجيب سيرة الفيلم ولا المشهد ولا يشرفني، ونفسي أنسى والناس تنسى بس معرفش ليه بعد ٢٥سنة بينبشوا في الماضي".

وأضافت :" في فنانات عاملين مئات الأفلام وفيها مشاهد نسأل الله المغفرة اشمعنى ميار اللي لازم تترجم وتتبهدل وكل اللي عاوز يعمل شو يبقى عليا، أنا برفض كل يوم مقابلات في برامج لكن مروة صبري أخت زميلتي عبير، وبحبهم هما الأثنين غير كده أنا حرمت أي مقابلة غير لما أعرف طبيعة الأسئلة".

واستكملت:" وهركز في كل كلمة ومش هذكر أسماء ولا مواقف بس الصحفيين واليوتيورز يرحموني من العناوين اللي ملهاش علاقه بالكلام اللي جوه الفيديو وبالنسبة للتريند اللي أنا عاوزه اركبه حد الله إني أركب التريند بشتيمه الناس ليا، وعلشان أكدلكم أنا محوله موبايلي ومبردش على أي صحفي".

وتابعت :" أنا نفسيتي تعبت وجالي اكتئاب وابني مضايق جدا وأختي كده كفايه وبالنسبة لاني بعمل كده علشان أنا اتنسيت وعندي حب للظهور قولوا اللي يعجبكم، أنا ناجحة في برنامجي ولله الحمد وراضية بيه ولو جالي شغل فدا رزق أشكر عليه ربنا مجاليش مش هلجاء للطرق الرخيصة دي علشان اشتغل وبالنسبة للميكب والرموش والاظافر حاضر هشلهم علشان ابقى كده واجهة للحجاب دا كل اللي عندي وأفوض أمري إلى الله إن الله بصير بالعباد".

وعلقت ميار على منشورها قائلة :" كفايه استحلفكم بالله كفاية لولا إن الانتحار حرام استغفر الله العظيم كنت قتلت نفسي عمري ماحسيت كمية الظلم دي إلا اليومين دول والله ربي شاهد على الافترا الناس اتهمتني بيه لمجرد إني قلت الحق أو حبيت أدافع عن نفسي، تبريراتكم غير مقبولة عندي ومش صح وافتراء أرحموني يرحمكم ربنا طب اهج واسيب بلدي وأتغرب أنا وأبني أعمل ايه يا خلق".