حسام حسن: «زوروا أرقامي مع الأهلي عشان خاطر الخطيب»
قال حسام حسن نجم الأهلي والزمالك السابق ومدرب المصري البورسعيدي، إن البعض داخل النادي الأهلي يحاول تشويه صورته.
وأضاف حسام حسن، في تصريحات تليفزيونية عبر فضائية «إم بي سي مصر»: «إحنا رجعنا من سويسرا على النادي الأهلي ولم نفرض شروطنا على صالح سليم للعودة واحنا في بيته وصلاح حسني، كان حاضرًا تلك الجلسة وهشام سليم، كان متواجدًا مع والده، إحنا مخدناش حتى 30 ألف جنيه ومقولناش نجيب حاجتنا ازاي من الغربة ومقولناش إحنا لسه مخدناش بيت في مصر ومقولناش إحنا لسه متجوزناش».
وأكمل، «لم نضع أي شروط للعودة للأهلي ولم نطلب تأمين مستقبلنا ولكن إحنا جايين الأهلي عشان احنا متربيين في النادي الأهلي وكنا بنام في الاستراحة وتعاملنا مع مدربين عظام مثل عادل طعمية، عرفنا يعني إيه النادي الأهلي».
وواصل: «أنا مشيت من النادي الأهلي وأحرزت 109 أهداف للأهلي في بطولة الدوري يعني أكثر لاعب منذ إنشاء الكرة المصرية أحرز أهدافا للنادي الأهلي».
وأردف: «محمود الخطيب اعتزل وهو أحرز 101 أو 103 أهداف، تفاجأت بعد ذلك أنا 109 والخطيب 109، عشان ميتقلش حسام حسن هو الهداف التاريخي للأهلي في الدوري»، مضيفًا: «أنا مش معايا إعلام عشان يدافع عني ويصحح تلك المعلومات، ولكن وجودنا في الأهلي يشرفنا وعدم وجودنا لحد تاني مش عاوز يدخلنا دي خلاص مش بإيدينا، بس لازم الجماهير الصغيرة يعرفوا إحنا من كباتن الأهلي ومشينا إزاي وإننا عمرنا ما نبيع النادي الأهلي ولا بفلوس الدنيا كلها واسألوا الزمالك، لما رحنا لم نضع أي شروط مالية، إحنا كنا رايحين نلعب كورة عشان نادينا اللي تربينا فيه مش عاوزنا».
