من جديد.. لاعبة الأهلي تهاجم إدارة النادي بسبب ابنتها «شاهد»
واصلت لاعبة الأهلي السابقة والإعلامية الحالية هناء حمزة، هجومها على إدارة القلعة الحمراء برئاسة محمود الخطيب، بسبب قيام قناة النادي بالهجوم على ابنتها مريم مصطفى لاعبة الفريق الأول لكرة الطائرة.
ولم يكن هذا الهجوم الأول لـ حمزة ضد مجلس إدارة النادي الأهلي بسبب انتقادها للعديد من القرارات والسياسات التي تخص ادارة النادى الأحمر.
وكتبت هناء حمزة عبر حسابها على موقع التواصل الاجتماعى فيس بوك قائلة:
لما قناة بحالها بكل مذيعينها تشتغل يوم بحاله عشان تهاجم فتاة صغيرة عشان امها بتقول كلمة الحق اللى رجالة كتير مايقدروش يقولوها ونازلين هجص ورمى تهم بالذمة انتم اعلاميين ولا ارزقية كنتم فين من الظلم والذل اللى تعرضت له اللاعبة اللى بتهاجموها كنتوا فين لما فى عز تألقها وحصولها على احسن لاعبة فى مركزها لما رميتوها برة النادى اعارة لنادى الصيد والمدير الفنى قال مش محتاجها وللعلم يا من تدعون انكم اعلاميين انا اشتكيت بدل المرة مرات للسيد الخطيب عن الظلم والذل والاهانة التى تتعرض لها لاعبة من نجوم مصر وللاسف اكتشفت انها اوامر الادارة كما قال المدير الفنى للمقربين.
وتابعت: المدير الفنى استخدم معها كل انواع الظلم والذل لدرجة انه ابلغ الكابتن رؤوف عبد القادر انه هيجمدها ورؤوف حي يرزق ولو كان عنده ضمير صعب انه يكذب ولو كذب يبقى حسبى الله ونعم الوكيل هو عنده اولاد انا عندى حاجات كتير أوى على اللى اتعمل فى بنتى على مسمع ومرأى من الادارة واستحملت ورجعتها تانى من الاعارة عشان الكيان اللى انتوا ماتعرفوش حاجى عنه انتوا بس بتدافعوا عن الفلوس والهبش اللى بتاخدوه.
وواصلت: انا عايزة اقولكم بس انتوا بتتشطروا على عيلة ومسخرين كل اعلامكم كان فين الاعلام ده لما الشيخ ترك مسح بكرامتكم الارض وقال عليكم اللى كل الدنيا سمعته ماشوفناش راجل فيكم طلع يدافع عن الكيان ولا طلع يكدبه ولا راجل فيكم رفع عليه قضية ولا بلاغ يا ترى السيستم اتغير من الصمت لغة العظماء الى سيستم اخر.
واختتمت "اختشوا عيب عليكم وصلت انكم تسلطوا الهاربين اعداء بلدنا عشان يشتمونى هو ده اسلوبكم المحترم يا من تدعون الاخلاق والوطنية".
