صفوة: زوجي الأولاني كان ضعيف جسديًا وكنت بضربه.. والتاني كان بيظبطلي الجزمة ويكويلي الهدوم

جدل كبير أثارته الراقصة والممثلة صفوة بعد تصريحاتها عن أحد أزواجها، وكشفت أنه كان يكبرها في السن، مؤكدة أنها فوجئت يوم الصباحية بأن لديه مشاكل نفسية وضعيف جسديًا وكان مجرد صورة على حسب وصفها.

وتابعت صفوة خلال استضافتها في برنامج الترابيزة: «كان يعمل محاسب وراجع من الكويت بعد 17 سنة عمل هناك، فمستواه في حتة تانية، وبدون ما أفكر ولا أحب اتقدم ليا وإتجوزنا، وعملي فرح أسطوري عشاني، وشقة فظيعة، وكل شيء فوق الخيال، لكن كان عنده مشاكل نفسية ومشاكل جسدية أكتر، كان صورة بس وده فوجئت بيه يوم الصباحية».

وتابعت: «وأمي زارتني لقيتني بنفس تسريحة الفرح، وهو كان حاسس بضعف طول الوقت، وفي بعض الأحيان كنت أجيب أفلام أميتاب باتشان، ومن كتر الغل والكبت أقول له تيجي نلعب، وأقف فوق الترابيزة وأعمل زي أميتاب باتشان وأضربه من غيظي، وساعات كان يحصل له خربوش في وشه».

وأضافت: «زوجي التاني فضلت معاه 18 سنة، لكن المشكلة إنه كان صغير وغير مسؤول وتعبان نفسيا، لكني شوفت فيه فارس الأحلام المثالي، زمايلي في مسرحية حودة كرامة كانوا يفتحوا الباب يلاقوه بيحط ألماظ في جزمتي ويكويلي هدومي، وفي الكواليس يعدل شعري».

وأكملت: «بعد 18 سنة زواج فوجئت إن كل فلوسي راحت ومديونة، وعندي قضية تهرب ضريبي، والقاضي دخلني القفص في القضية وسط 11 راجل عليهم قواضي، فجالي انهيار عصبي، وماكنتش شايفة ولا سامعة حاجة، وفي الوقت ده كان جوزي موجود، وقال إن المحاسب نصاب وهنرفع عليه قضية، واكتشفت بعدها الخيانات التانية».