«حب الناس مش بالفلوس».. أول تعليق من إيمي تاتو بعد وقف برنامجها على قناة «الشمس»
علقت إيمى تاتو، خبيرة التجميل، على الجدل المثار بعد وقف برنامجها وهجوم عدد من الإعلاميين عليها، بسبب نشر برومو تقديمها لفقرة بأحد البرامج التليفزيونية.
وقالت إيمي تاتو عبر «فيسبوك»: «الحمد لله والفضل كله لله قدر الله وما شاء فعل.. هو أنا بصراحة مش عارفة ليه حصل غضب على السوشيال ميديا، خصوصا عند بعض الإعلاميين، خصوصا المبتدئين.. الموضوع أخذ أكبر من حجمه الموضوع كله كان فقرة في برنامج بتقدمه مذيعة أصلا اكتمال الموضوع أو انتهاؤه ولا فارق معايا».
وأضافت: «أنا قبلته بناء على طلب كثير من السيدات عن عرض بعض المعلومات والتجارب اللى تخص جمال المرأة وعلاقتها بالشعر والبشرة والتاتو، أنا أتعرض عليا كثير من التمثيل والظهور في برامج وحلقات خاصة وعرض قصة حياتى وعلطول برفض لأنى فعلا تركيزى كله على شغلى، وده البرنامج الوحيد اللى قبلته لأنه خاص بفقرة عن المرأة اعتبرته دردشة زى مابدردش على بيدج المطبخ أو التاتو».
واستكملت: «كبرتوا الموضوع أوى ودى معاها ودى معهاش، وهوه لا فارق عندى من الأساس، أنا برفض أي عرض منتج كإعلان مع إن المكسب من وراه كتير.. أنا برفض لقاءات كتير مع صحفيين وقنوات معروفة جدا وكمان بمقابل مادى، أنا برفض دخولى في التمثيل مع إن كتير شجعنى أنى أقبل، برفض أستغل بيدجاتي لأى نوع من الترويج أو زيادة الريتش».
واختتمت: «كل شغلى تاتوهات والمطبخ كحب دردشة معاكم وليس أكثر مع احترامى طبعا لقناة شمس وغيرها أنا أقدر على بيدج واحد من بيدجاتي مع أحلى فانز أوصلهم اللى عايزاه وتحت أمرهم في أي استفسار، وأخيرًا أحب أوصل معلومة، خصوصا للإعلاميين المبتدئين اللى شنه الهجوم وغيرهم.. حب الناس مش بيشترى بالفلوس حب الناس ده من عند الله ولا بالشهادات ولا التدريبات.. وأنا حب الناس ليا يسوى كنوز الدنيا.. واستنوني بالأحلى لايف اليوم بإذن الله».
