عمرو أديب يتصدر «تويتر» بعد دفاعه عن محمد الشوربجي
تصدر هاشتاج «عمرو أديب»، قائمة الأكثر تدوينًا في مصر بعد تصريحاته حول تجنيس محمد الشوربجي لاعب الاسكواش المصري بالجنسية البريطانية، وتخليه عن اللعب لصالح مصر.
وقال أديب خلال تقديمه برنامج «الحكاية» المذاع عبر فضائية «إم بي سي مصر»: «الراجل قضى نص حياته في إنجلترا وانت كنت بتبعت تجيبه يلعب باسم مصر، ولما جه دفع التمن، وأعاد لمصر حقوق الجنسية المصرية وحققلنا بطولات كتير، قالبين عليه الدنيا ليه، ربنا معاه، انت هتلعبه غصب عنه؟ وعاوزين الحق، إحنا مقدمنالوش أي حاجة».
عمرو اديب، وأكمل مقدم «الحكاية»: «أنا مش شايف إن محمد الشوربجي عمل حاجة غلط خالص، الراجل ده تربيته وأكله وشربه في إنجلترا ومحدش قدم له حاجة، ومصر خدت شبابه كله، خلاص هيلعب اسكواش مع بريطانيا ربنا معاه، إيه اللي أنت عملتهوله، عشان يكمل معاك أو يلعب باسم مصر، هو حر».
وأردف أديب: «البعض يحاول إلصاق تهمة الخيانة العظمى بالشوربجي، إحنا نقوله متشكرين و مصر ولادة، وربنا معاك، وأنا شايف إن الشوربجي دفع الدين اللي في رقبته لمصر بطولات قارية وعالمية».
وقال مقدم «الحكاية»: «بلاش الحالة التشنجية دي، الشوربجي تحت إغراء غير طبيعي والموضوع مش سهل، تمنوا له حظًا سعيدًا، وعندك جوهرة حافظ عليها، واتعاملوا بشويش على الناس، إحنا عندنا آلاف الأطباء والمهندسين اللي بيسافروا برة وياخدوا الجنسية الأجنبية ومحدش بيتكلم عنهم ولا يهاجمهم».
