شمس البارودي: مش أنا الوحيدة اللي مثلت أدوار جريئة وتبرأت منها

في تعليق صريح ومباشر، ردّت الفنانة المعتزلة شمس البارودي على الانتقادات التي طالتها بسبب مشاركتها في أفلام قديمة وُصفت بـ"الجريئة"، مؤكدة أنها لم تكن الوحيدة بين نجمات السينما التي قدمت مثل هذه الأدوار.

وقالت شمس عبر منشور على فيسبوك: "أنا اشتغلت مع كبار المخرجين، وفي أفلام وافقت عليها الرقابة، وكل الممثلات الجميلات عملوا نفس النوع من الأدوار، سواء قبل أو بعدي، وأنا وقتها ماكنتش كملت 27 سنة".

وأضافت: "اللي بيهاجموني النهارده بيتجاهلوا إن في نجمات كتير لبسوا مايوهات واتعملهم مشاهد مشابهة، ومع كده محدش بيكلمهم. الهجوم ده مش عليّا بس، ده إحساس بالذنب وتوتر من ناس بتتكلم على نفسها من ورا الهجوم".

كما وجهت شمس انتقادًا لاذعًا للفنان محمد رمضان، قائلة: "ليه ما حدش بيهاجم الوسط كله، اللي بيكسب ملايين من الأعمال اللي بيقدمها رمضان؟ هو ده مش نفاق؟".

واسترجعت البارودي واقعة الطيار الراحل أشرف أبو اليسر، الذي أُوقف عن عمله بعد فيديو مع رمضان، وقالت: "الراجل مات مقهور، وربنا حيحاسب كل ظالم. زمن المسخ فعلاً، اللي ملوش قيمة بقى نجم واللي عنده قيمة بيُنسى".

واختتمت: "أنا بتبرأ من أدوار كنت أتمنى ما أعملهاش، لكن ضميري مرتاح، ومش بخاف أقول كلمة حق، حتى لو زعلت ناس كتير".