ويزو: نفسي اشتغل مع محمد سامي وأقدم دور دراما
أعلنت الممثلة دينا محسن الشهيرة بـ "ويزو" عن أمنيتها في تقديم عمل دراما بعيدا عن الكوميدي وأن تتعاون مع المخرج محمد سامي.
وصرحت ويزو خلال لقائها في برنامج "بالملك والقلم" من تقديم عبد العزيز أحمد: "نفسي أعمل دراما، عايزة أثبت لنفسي أني بعرف أمثل لدرجة أن وصل معايا الموضوع إني بحس أن الكوميدي أسهل، بس اكتشفت أن الكوميدي صعب، أنك تبقى قاعد قدام 1200 متفرج وتضحكهم صعب جدا، بس الدراما بتوصل لقلب الناس خصوصا المصريين بيحبوا الدراما".
وأضافت ويزو لتكشف عن ممثلينها المفضلين قائلة: "أنا مثلا ممكن أبقى قاعدة اتفرج على ناس يعيطوني، حنان مطاوع جبارة وريهام عبد الغفور خطيرة، ومنى زكي وغادة عبد الرازق".
وأعربت ويزو عن أمنيتها في التعاون مع المخرج محمد سامي في عمل ما قائلة: "محمد سامي مخرج حلو حلاوة، أنا مشفتش زي المخرج ده في الدراما، عمري ما اشتغلت معاه وأتمنى إني اشتغل معاه، بيودي الممثل في حته تانية، كان مطلع إدوارد في "البرنس" بشكل مختلف، وشفت بعد رمضان مسلسل "نعمة الأفوكاتو" مسلسل حلو جدا ومي عمر شاطرة، محمد سامي بيخرج من الممثل حاجات مش منطقية أكيد بيقعد يقولهم كلام يشحنهم".
