«أكلوا تعبي وشقايا».. بوبو يفتح النار على إدارة فيوتشر بعد رحيله

فتح محمد رضا بوبو لاعب الفريق الأول لكرة القدم بنادي بيراميدز، المنتقل حديثًا من صفوف فيوتشر، النار على مسؤولي الأخير بسبب عدم حصوله على مستحقاته المالية.

وكتب بوبو عبر حسابه الرسمي على موقع التواصل الاجتماعي "فيسبوك": "خلاص مبقيتش قادر أصبر أكتر من كدة بصراحة، حتى لو العواقب كتير ولو هيحصل إيه، المهم أهدي النار اللي جوايا شوية علشان تكون حتة ارتحت من جوايا وكدة كدة ربنا موجود وهيجبلي حقي".

وتابع: "أنا كنت خلصت وجالي اتصال تعالى ضروري النادي عشان تمضي الاستغناء بتاعك، عشان خلاص أنت مشيت قولت حاضر، وركبت عربيتى وطلعت على النادي، الساعه 11 بليل".

وواصل: "الناس قابلتني في النادي وقالولي عامل إيه يا رضا عايزينك تمضي ورقتين، ورقة مخالصة والاستغناء، قولتلهم الاستغناء حاضر همضي مفيش مشكلة، أمال إيه اللي يخليني أمضي مخالصه وأنا ليا 4 مليون، و200 ألف جنيه".

أكمل بوبو: "في واحد لا داعي لذكر اسمه لإنه ده ميعرفش ربنا، طبعا قعد يكلمني ولازم تمضي ولازم تمضي، أقوله إزاي يا كابتن أمضي مخالصة وأنا ليا فلوس، قولت مش همضي ومشيت ومضيت على الاستغناء، جالي اتصال امضي وأنت فلوسك عندي ومتقلقش، امضي وأنت وزملائك اللي ماشيين، هنيجي ونسلم عليكم وتاخدوا الشيك بالدولار، زي باقي الفرقة ونشكركم، أكيد يعني، قال أه امضي بس اتفقت مع الاتنين، اللي كانوا معايا، عشان كنا متفقين إننا هنعمل كل حاجة بالإتفاق مع بعض، فقالوا هنضمي كلنا، ونروح التلات ناخد الفلوس".

وتابع: "مضينا علي الورقة، وجه يوم التلات لقينا اللاعبين كلهم طلعلهم فلوس، وكل واحد أخد شيك ماعدا إحنا التلاتة، والمعارين اللي مشيوا من النادي، واتصلت بالشخص ده قولتله الشيك بتاعنا امتى، قالي بليل في ناس الصبح وفيه بليل، وإنت بليل قولتله ماشي، جه بليل كلمته، قالي الصبح، فضلت على الحال ده كل يوم، يقولنا التلات الجاي، ييجي التلات يقول الأسبوع الجاي، ييجي الأسبوع الجاي يتقال بكرا، كمان يومين علي الحال".

وأضاف: "في حده مشكور طبعًا بدون ذكر اسمه قالي انا بحبك وانت أخويا الصغير لو إنت مفكر إنك طلعلك فلوس، يبقى بتحلم مصدقتش وقولت لأ اكيد الفلوس هتطلع، الناس كلموني وقالولنا الفلوس عندنا، وأنا مصدقهم ومعايا، بس من الواضح إن مفيش فلوس جاية ولا أي حاجة، على العموم حسبي الله ونعم الوكيل في كل واحد أكل حقي وتعبي اللي شقيت فيه سنتين، تعبت وسفر هنا ولعبنا إفريقيا وخدنا بطولة، وطلعنا مركز رابع سنتين، يعني الحمد لله مقصرتش في حاجة بس فكرت إن حد ياكل حقك فدي صعبة عليا أوي، وأنا زعلان لإن مشفتش التقدير".

وشدد بوبو: "أنا اتبعت أنا وأصحابي وحلينا أزمه للنادي برقم كبير يعني، أنا ممشتش ببلاش ولا مكنتش بلعب، ولا مكنتش مساهم في ده كله عشان تاكل حقي بالطريقة دي أنا عارف الكلام ده هيضايق ناس، بس دي الحقيقة أنا ليا حق وعلى حق، وأنا عمري ما كنت بخاف من أي حاجة".

واختتم: "بس إزاي بتعرف تنام وتحط دماغك علي المخدة وأنت واكل حق وشقى واحد طلع عيونه عشان يجمع رقم ذي دا، وانت عايز تاكله عليه بكل سهولة كده، أنا حقي عند ربنا وربنا هيجبهولي أضعاف، وأنا متاكد لإني مقصرتيش في حاجة وربنا يعلم كده أنا من جوايا ارتحت".