«كولر السر».. محمد الصايغ يكشف كواليس مفاجئة في رحيل سيد عبد الحفيظ

كشف الناقد الرياضي محمد الصايغ، كواليس مفاجئة بشأن رحيل سيد عبد الحفيظ مدير الكرة بالنادي الأهلي، وتعيين خالد بيبو بدلًا منه.

وقال محمد الصايغ في تصريحات عبر برنامج "الريمونتادا" المذاع عبر قناة "المحور": "رحيل سيد عبد الحفيظ ليس وليد الصدفة، الموضوع كان نية مبيتة بعد دخوله في أزمة مع مارسيل كولر مدرب الأهلي من حوالي 5 أشهر".

وتابع: "كولر طلب حاجات معينة من سيد عبد الحفيظ، أبرزها استياءه من وجود عدد عمال كبير في ملعب مختار التتش وشايف إن عددهم مبالغ فيه على الشغل اللي بيتعمل، وطلب تقليل العمالة أو إنهم يكونوا في مكان تاني، بحيث يقنن العمل داخل التتش".

وشدد: "هو الراجل رؤيته شايف إن دا صح، زي ما غير قبل كدة وطلب التدريب ميكونش مفتوح، ومن حق المدير الفني يطلب اللي عايزه".

وأضاف الصايغ: "ورحيل سيد عبد الحفيظ كان من مطالب كولر للموسم الجديد، خصوصًا إن السويسري بقى يعمل اللي هو عايزه في الأهلي، بعد ما نجح في التتويج بخمسة بطولات وكسب ثقة الجماهير ومجلس الإدارة".

وأكمل: "سيد عبد الحفيظ كان بيتدخل في بعض الأمور الفنية ودا أغضب مارسيل كولر، علشان كدة المرة الجاية مش هنشوف خالد بيبو في المحاضرات الفنية، وهيتم تقليص دوره، لإن كولر مش عايز عشم في الشغل".

واختتم محمد الصايغ تصريحاته: "وكمان هيبقى ممنوع على خالد بيبو، التدخل في مفاوضات مع اللاعبين لتجديد عقدهم أو الحديث في زيادة وأمور مادية، لأنها مهمة أمير توفيق المسؤول عن التعاقدات فقط".