شاب يستغيث على السوشيال ميديا.. اعرف قصته

أثار شاب يدعي محمد عبدالله يبلغ من العمر 24 عاما، جدلًا واسعًا على مواقع التواصل الاجتماعي، بعد أن ظهر في فيديو، وتحدث عن ظروف حياته الصعبة، وخاصة إنه عاش حياته بملجأ أيتام في طنطا في دار الهدى لرعاية الأيتام.

قال محمد: إنه مر عليه ظروف صعبة جداً، وغادر الدار بعدما بلغ سن الـ18، بعد أن قاموا بطرده من الملجأ، وقالوا له: "روح الشارع شوف حالك".

وتابع محمد: "أصبحت أعيش في الشارع، وأعاني من قلة الأكل وعدم وجود مأوى من البرد والحرارة، وعانيت حالة يائسة جداً، وشعرت بالإحباط والتشاؤم تجاه المستقبل".

وأضاف: "أنا محتاج كل الناس وكل المسؤولين يقفوا جنبي، لأني تعبت جداً من النوم في الشارع وقلة الأكل، وأريد فقط فرصة للعيش بكرامة والعمل وتوفير سكن لي".

وأردف: "أنا ببات في الشارع لحد دلوقتي في محطة قطر طنطا، أنا ماليش ذنب في اللي بيحصل، معرفش أهلي رموني ولا اتخطفت منهم، أنا طالب شغل، أنا تعبت من نومة الشارع وقلة الأكل، عمري في حياتي ما أكلت أكل بيتي، كل اللي بأكله من الشارع وبواقي من الزبالة، كل ده عشان مشحتش ولا أسرق ولا أتاجر في حاجة حرام".

واستكمل: "أنا مش بشرب سجاير ومحافظ على نفسي، محتاج شغل بس يكون سكن بجد أنا حقيقي تعبت، في حد كلمني قالي اتبرع بكليتك عشان تمسك مبلغ بس خوفت من ربنا ومن العملية، أنا مش لاقي حد يقف جمبي أرجوكم شوفولي شغل يكون بسكن"

وختم حديثه: "بخاف من الكلاب تأكلني وأنا نايم كل يوم، أرجوكم وصلوا صوتي للمسئولين، يوفروا لي سكن، أنا شاب والعمر بيجرى ومستقبلي بيضيع".