مناشدة عاجلة من مؤسس صفحة «أطفال مفقودة» لسوء معاملة فتيات في دار أيتام شهير
ناشد رامي الجبالي مؤسس صفحة أطفال مفقودة على موقع التواصل الاجتماعي فيس بوك، وزارة التضامن الاجتماعي من أجل التدخل لإنقاذ فتيات في دار أيتام شهير.
ونشر صورة عبر فيسبوك، وكتب: "دي صوره صورها مجموعة بنات زي الورد من دار زمزم في مصر الجديده وقت فطار رمضان النهارده".
وتابع: الصوره دي فيها كمية قهر غير طبيعي، ليه بقي ؟، عشان البنات دي اشتكت لـ وزارة التضامن الاجتماعي من سوء المعامله من فتره، و بناء عليه حاليا بيتم التنكيل بالبنات دي عشان قرروا يقولوا أن المعامله وحشه وأننا كبرنا علي المعامله دي و ميصحش نتعامل زي العبي".
وأضاف: "دي صوره وليمه معموله لموظفين الجمعيه علي الفطار، عصير و فراخ و لحمه و رز و خلافه ... و في المقابل كيس فيه كام رغيف حواوشي بايت رموه للبنات تأكله علي الفطار".
وواصل: "البنات كلمتني تعيط و بتقول ان موظفين وزارة التضامن خلاص بطلوا يردوا علي تليفوناتهم و البنات مبقتش عارفه تعمل ايه و لا تروح لمين ... عاوزين حد يسمعهم بس !".
فناشد وزارة التضامن وكتب: "يا معالي وزيرة التضامن وأم الايتام في مصر الشرعيه يرضيكي ده يكون فطار الايتام في رمضان ؟ يرضيكي البنات تكلمني تعيط و تقولي مش عارفين نكلم مين و لا نروح فين !! يرضيكي عرايس بدون لبس !!".
وتابع: "اللي بتشتغل عاوزينها تبطل شغل .. لمجرد انها اشتكت ... واللي بيسحبوا تليفونها بيرجعوه محروق ومليان ميه عشان خايفين يكونوا مسجلين او مصورين حاجه بيه".
وأردف: "البنات بتقولي المصروف بتاعنا بيتخصم منه بال ٥٠ و الـ ١٠٠ جنيه عشان تأخير ٥ دقايق و ١٠ دقايق بعد الساعه ٩ مساء في ظل الظروف اللي عايشين فيها دي كلها ؟".
ووواصل: "يا معالي الوزيره دي بنات عرايس علي وش جواز .. و قهر البنات دي عشان بتشتكي هتخليهم يهربوا في الشوارع أو يقبلوا بأي واحد يقول لهم هتجوزك و يرميها بعد كام يوم للشارع، هتقولوا البنات وحشه و بتهرب، ما هي بتهرب من اهمال موظفينكم ومن القهر !".
وناشد: "إتقوا الله في الاطفال دي عشان ربنا يرفع عن مصر البلاء في أيام مفترجه ... دي أيتام ... ابعتي حد يا معالي الوزيره يسمع البنات القديمه في الدار و يحل مشاكلهم".
